Noraker Gård

Velkomen til Noraker Gård. Gardsbutikken er open sju dagar i veka mesteparten av året. Ved inngangsdøra finn du opningstidene.

Gardshistoria

Noraker blir fyrste gong nemnt i skriftlege kjelder i 1337, og har sidan 1500-talet vore i same slekt. I dag er det 12. generasjon ved Nils Noraker som er drivar av garden. Garden er av dei større i Valdres med fleire fjellvatn og med omlag 8000 dekar skog. Eigedomen strekk seg frå Aurdalsfjorden (300 moh) opp til Binnhøvdsknatten (1165 moh). Gjennom tidene har garden hatt fleire stølar og til saman 13 husmannsplassar. Ifølge folketeljinga som vart gjort i 1860 var det over 60 personar som hadde bustadadresse på Noraker.

Næringsvegane på Noraker har vore skogbruk, jordbruk, husdyrhald, jakt og fiske, der skogen lenge var hovudnæringa. Mjølkeproduksjon heldt fram til byrjinga av 1960-talet, og 200 sau på vinterfôr fram til 1979. I dag er det vatnet som gjev grunnlaget for hovuddrifta på garden.

Historia rundt rakfiskproduksjonen

I 1969 var Unni og Gunnar Noraker nygifte og dei starta samstundes opp med fiskeoppdrett og produksjon av rakfisk. Det vart starten på eit eventyr som etterkvart skulle bli hovudnæring på garden. Fyrste året vart det take ut 117 kg. Fram til 1993 hadde me foredling- og kjølerom i kjellaren i våningshuset, det lukta dimed rakfisk i heile huset i tida før jul. Den fyrste delen av fiskehuset vart så satt opp.

Sonen Nils tok over i 2005 og har sidan vidareutvikla drifta. I 2013 vart næringslokale utvida ytterlegare med omlag 500 m2. Dette omfamna fleire rom til foredling, kjølerom og ein større gardsmatbutikk. Seinare er det òg laga både røykt og grava fisk i tillegg til rakfisk. I 2020 var sju årsverk sysselsett i produksjonen på garden.

Rakfiskprosessen

Etter at fisken er salta skjer modninga ved at mjølkesyrebakteriane som naturleg er til stades driv fermenteringsprosessen. Modningsostar nyttar òg ein slik prosess med mjølkesyrebakteriar som ved raking. Frå gamalt av vert fisken moden etter berre to-tre månadar. I dag er det strenge krav til hygiene og temperatur som gjer at prosessen tar mykje lengre tid. Den milde fisken modnar på kjølerom i 5-7 månadar, den lagra i 7-12, medan den vellagra fisken modnar frå 1-2 år. Rakfisken frå Noraker har ein karakteristisk smak, ein delikat raud farge og ein fast, smørjevillig konsistens. Dess meir modna fisken er, dess meir smørjevillig er han. Fisken er ei ettertrakta delikatesse og Noraker har gjennom åra vunne mange prisar.

Gardsbutikken

Me sel meir enn halvparten av rakfisken direkte frå gardsbutikken vår. Frå eigen produksjon sel me òg frosen, grava og røyka fisk. Elg frå Norakerskogen blir foredla til spekepølse av Fagernes Kjøtt AS i Etnedal. Deretter vert ho hengt opp til tørk på det store stabburet (frå 1906) på tunet på Noraker. Små Vesen bryggeri på nabogarden lagar eige Norakerøl som er spesiallaga til rakfisken vår. I gardsbutikken har me også mykje anna lokalmat.

For opningstider og kontaktinformasjon, sjå noraker.no.

Kart